Jæja, sögu skal ég segja ykkur!

Var í miðannarprófi í Þjóðhagfræði fyrir tæpum tveimur vikum sem gildir 20% minnir mig… nú, var í tíma áðan þar sem kennarinn var að ræða um prófið. Hann kvartaði sárann yfir því hversu illa okkur hefði gengið og var eitthvað ósáttur við meðaleinkunn hópsins…. þá strax varð ég frekar súr enda bjóst ég við því versta. En nei… fór áðan og fletti einkunninni upp á netinu. Og hvað haldiði?
Jú, andskotinn hafi það, ég var einn með 10!!!! Ég gapi ennþá af undrun yfir þessu. Þetta er soddan della að það nær engri átt! Þar sem Þjóðhagfræði er reyndar eini áfanginn sem ég mæti í, þá býst ég ekki við viðlíka árangri í öðrum námskeiðum.. því er nú ver og miður.
Varð bara að deila þessu með einhverjum.

Annars er þessi örleikur algjör snilld… maður verður gjörsamlega hooked á að reyna að hitta í sætið á bílnum!

Yfir og út.

Ég hef gjörsamlega misst allt álit á eiginhagsmunapopulistunum í Reykjavíkurlistanum.

Ég fagna því hins vegar að fyrrverandi Röskvumaður taki við borgarstjórastólnum..

Fjandinn hafi drusluna sem ég fékk í staðinn fyrir Polo-inn minn! Polo-inn fór á réttingaverkstæði í dag og í staðinn borguðu tryggingarnar Yaris smábíl fyrir mig á meðan… og jesús pétur! Í fyrsta lagi þá er bílinn gjörsamlega óhljóðeinangraður, í öðru lagi eru aksturseiginleikarnir ómögulegir, í þriðja lagi er kúplingin léttari en fjöður, í fjórða lagi eru græjurnar með verri hljóm en dósahátalararnir á fartölvunni minni og svo mætti endalaust telja.

Annars hefði þetta aldrei gerst á gömlu mözdunni minni. Hún brást aldrei og enginn vogaði sér að dælda hana, ó nei. Hvers vegna, kæru vinir, leyfðuð þið mér að selja hana?
Polo-inn er svo sem ágætur til síns brúks, segi það ekki. Það er hins vegar engin lífsreynsla að keyra hann… aldrei nokkurn tímann myndi ég fara út á honum til að rúnta! Síðan bilar hann örugglega bara meira en Mazdan… og hún var ’88 árgerð! Ég vona innilega að strákurinn sem keypti hana af mér hafi tekið mig alvarlega þegar ég bað hann um að hringja fyrst í mig þegar hann ætlaði að selja hana…

En jæja, nóg um það. Þórólfsmálinu er að lægja. Las stuðningsyfirlýsingar frá Guðmundi Árna og Gunnari Erni til Þórólfs í sunnudagsmogganum og var innilega sammála þeim. Þeir hafa svo sannarlega gert sín mistök og fengið að gjalda fyrir þau… slíkir menn eru kannski einna marktækastir akkúrat í þessu máli… Ég legg að minnsta kosti frekar við hlustir þegar þeir tjá sig um málið heldur en þegar siðapostularnir fordæma manninn úr hásætinu sínu… Þeir eru margir hverjir svo sannarlega að kasta steinum úr glerhúsi. Vonandi sjá Vinstri grænir ljósið og hætta að pressa á uppsögn Tóta.

Annars er ég að drukkna í lærdómi þessa dagana. Er semsagt í fimm áföngum: Stærðfræði 3, Tölfræði 2, Fjármálum 1, Viðskiptahugmyndum og Þjóðhagfræði 2. Er að leggja lokahönd á viðskiptahugmyndaverkefnið í þessari viku og mun kynna það næstkomandi föstudag (kynningin gildir 20%, verkefnið 80%). Þjóðhagfræðin gengur ágætlega – mæti alltaf í tímana og hef gaman að. Hinir þrír áfangarnir eru hins vegar öllu verr staddir.
Ég hef mætt í flesta dæmatímana í Stærðfræði 3, en hef hins vegar ekki séð mér fært að mæta í fyrirlestur klukkan 8 á þriðjudagsmorgni enn sem komið er. Náði sem betur fer að redda mér glósum úr öllum fyrirlestrum vetrarins rétt áðan, en þarf hins vegar fyrir vikið að fara mæta í restina af tímunum! Það er nú líka nauðsynlegt ef ég hyggst ná áfanganum.
Ég hef mætt afar sjaldan í dæmatíma í Tölfræði 2 og aldrei nokkurntímann látið sjá mig í fyrirlestri klukkan 8 á mánudagsmorgni (common I have a life!)! Það mun koma í ljós hvernig mér vegnar í prófinu…´
Og síðan eru það Fjármál 1… fallfagið mikla. Ég hef ekki ennþá heiðrað kennarann og nemendurnar með nærveru minni – hvorki í fyrirlestrum né dæmatímum. Ég hef líka látið það ógert að opna bók. Prófið er eftir sléttan mánuð.

Þessi prófatíð verður því eins og allar aðrar prófatíðir mínar í Háskólanum. Frumlestur, svitaböð , ógleði, efasemdir um ágæti mitt og stefnu í lífinu og svo framvegis og svo framvegis.
Frábært alveg.

Annars ætla ég semsagt að stefna á það að vakna klukkan 07 í fyrramálið og mæta í fyrirlestur í stærðfræði. Í morgun fékk ég yndislegt SMS af netinu.. það hljóðaði svo: “Til hamingju! Þú hefur verið dreginn úr pottinum hjá okkur og hefur unnið þér inn vakningarsms í viku!”
Skilaboðin komu frá ónafngreindum aðila.

Þetta kemur sér svo sannarlega að góðum notum! Ég á einstaklega erfitt með að vakna á morgnana og þarf alla þá hjálp sem þið getið veitt mér! Svo ef þú, lesandi góður, verður vaknaður fyrir klukkan 7.30 á morgun þá máttu gjarnan senda mér sms í s. 690-9082 og hvetja mig til dáða!

Þitt SMS skiptir máli!

Ég held að fólk verði aðeins að draga andann hægt og rólega yfir öllu þessu Þórólfs máli. Öll reiðin sem er í þjóðfélaginu virðist concentrenast í andúð á þessum eina manni og finnst mér það heldur gróft. Ég veit reyndar ekki hvort að ég sé alveg dómbær – kann einstaklega vel við manninn og finnst hann afar hæfur borgarstjóri.

Sá hann í Ísland í dag rétt í þessu og svaraði hann svona lala fyrir sig… pabbaskotið á hana Jóhönnu (sem er dóttir Villa Vill, oddvita Sjálfstæðismanna í borginni) var dáldið fyrir neðan beltisstað, en svo sem alveg réttmætt… er hún ekki soldið hlutdræg til að vera að yfirheyra hann á hlutlausan hátt? En jæja, eftir skotið þá hljóp heldur betur illt blóð í spyrlana en Tóti stóð það ágætlega af sér… ég skil allavegana hvað hann er að fara. Að sjálfsögðu ber hann ekki ábyrgð á þessu samráði, en hlutur hans í málin er nottla einhver… Það er hins vegar staðreynd í málinu að hann starfaði þarna í aðeins 4,5 ár og var afar samvinnufús í rannsókn Samkeppnisstofnunar. Sé ekki að í honum grasserí demantssvart gróðahjarta sem svífst einskis til að hafa illt við.

Svo að vandlega íhuguðu máli þá er ég á móti því að honum verði sagt upp. Ég trúi á að það eigi að gefa fólki annað tækifæri og finnst allt benda til þess að einmitt Tóti eigi slíkt skilið… Ef að Sjálfstæðismenn eiga að vera samkvæmir sjálfum sér þá hljóta þeir að vera sammála mér – Árni Johnsen var nú ekki einu sinni kominn af skilorði þegar hann var skipaður í stjórn RARIK… og aldrei nokkurn tímann sýndi hann samstarfsvilja eða iðrun yfir brotum sínum.

Gefum kallinum séns…

Peace out.

Skellti mér í Röskvu-kosningapartý í gær í kjölfarið á afar erfiðri og langri kosningabaráttu. Skemmti mér nú bara nokkuð vel á svæðinu, þrátt fyrir að vera undir stöðugri orrahríð frá spéfuglum kvöldsins, sem virtust hafa fest á mig einskonar “bullseye”! Öllum að óvörum entist ég reyndar manna næstlengst og hélt ekki heim á leið fyrr en 06:30… svaðalegur árangur það!

Fór síðan að sækja bílinn um hádegisbil í dag, eftir væran blund, og sá mér til mikillar skelfingar að það hafði verið bombað aftan á bílinn minn! Afturhlerinn á litla Pólónum mínum alveg í köku og ekki einu sinni hægt að læsa skottinu! En hallelujah…. manngarmurinn sem hafði gert þetta festi miða á rúðuna mína þar sem hann tók fram símanúmer og alles og baðst afsökunar á ódæðinu!

Ég varð meir, nay, klökkur, yfir þessari ótrúlegu framkomu! Það er alveg einstaklega gleðilegt hvað fólk er fínt inn við beinið.

Á sömu nótum hvet ég einmitt fólk til að sniðganga verslanir bensínstöðvanna (nema ef kaupa þarf langborgara – enda fæst hann hvergi annars staðar) og helst að sniðganga stóru þríburana bara algjörlega og fara í Atlandsolíu…

P.S. Hvort finnst ykkur meira hipp og kúl – B.S. gráða eða B.A. gráða?

Adios muchachos…

Já, ég er í svaðalegum fíling klukkan 03.49 á aðfaranótt mánudagsins 1. nóvember! Það er alveg ótrúlegt hvað árið hefur liðið hratt – bara kominn 11. mánuður af 12 og maður þarf fljótlega að fara gera árið upp. “Hverju hef ég áorkað á árinu?” spyr maður sig kannski… ég þakka nú pent fyrir það að hafa tvo mánuði í viðbót til að fylla út í þann fátæklega flokk!

Annars má maður svo sem ekki gera lítið úr sjálfum sér. Steig all-svaðalegt skref í gær… tók þá punghlífina af hillunni og lék minn fyrsta leik í marki í handboltaleik í yfir 6 ár! Ég var að sjálfsögðu einungis uppfyllingarefni í þessum fyrsta leik mínum enda langt í frá í góðu formi, en náði þú einum tíu mínútum á milli stanganna. Við í UBK náðum frækilegum sigri á andstæðingum okkar og höfum nú tryggt okkur fyrstu stiginn okkar í A-riðli utandeildarinnar… hipp hipp húrra!