• Fyrsti skóladagurinn í gær og ég skemmti mér vel. Með kostuglegum hætti tókst mér þó að missa af fyrsta klukkutímanum í fyrsta fyrirlestrinum mínum í LSE… var búinn að setja alla tímana mína inn í Google Calendar í síðustu viku, en brá svo á það stórsnjalla ráð að breyta tímakerfinu í Calendar úr íslenska yfir í það breska. Við það hliðraðist öll áætlunin mín aftur um eina klukkustund, takk fyrir kærlega!
  • Í gær gerði ég þau mistök að taka út 50 pund í hraðbanka af Mastercard-inu mínu. Það kostaði mig rúmlega 15 þúsund krónur, sem gerir rúmlega 300 krónur á pundið. Á sama tíma var gengið skráð víðast hvar í kringum 220-250 krónur. Þvílíkt okur – mér er skapi næst að hætta að nota Mastercard!
  • Á föstudaginn þarf ég að borga leiguna hérna á Passfield fyrir haustönnina, 1480 pund rúm. Þvílík tímasetning! Eins og sakir standa mun ég þurfa að borga leiguna á gengi í kringum 200 kr., sem er (vonandi fyrir Ísland) talsvert óhagstæðara gengi en ég mun fá námslánin mín greidd út á í janúar. Af hverju er ekki löngu búið að breyta útlánareglunum þannig að námsmenn sjálfir þurfi ekki að bera gengisáhættuna af námslánunum sínum? Mánaðarlegar greiðslur myndu til dæmis stórlega minnka þessa áhættu – nú eða þá að miða námslánin við eitthvað meðalgengi yfir önnina í staðinn fyrir að festa allt við gengið á útborgunardag. Pff!
  • Það var gjörsamlega fáránlegt að horfa á stjórnmálamanninn Davíð Oddsson í hlutverki Seðlabankastjóra í Kastljósinu áðan. Engu líkara en að hann væri ennþá í forsvari fyrir ríkisstjórn. Þarf ekki að huga að því að ráða nýjan seðlabankastjóra faglega þegar þessu stormviðri er lokið?
  • Til að enda á einhverju jákvæðu: Lenti á spjalli við ítalska stelpu yfir kvöldmatnum áðan og hún uppveðraðist öll við að heyra að ég væri frá Íslandi. Þá eru Sigurrós og Múm uppáhaldshljómsveitirnar hennar og Nói albinói ein af hennar uppáhaldsmyndum… 101 Reykjavík þótti henni hins vegar eitthvað slöpp. Því næst fór hún að spyrja mig út í einhverjar fleiri íslenskar hljómsveitir, sem ég vissi ekki einu sinni hverjar voru… frekar vandræðalegt það!